ХАН-УУЛ ДҮҮРЭГ ДЭХ ЦАГДААГИЙН НЭГДҮГЭЭР ХЭЛТСЭЭС ШӨНИЙН ЭРГҮҮЛИЙН ЧИГЛЭЛИЙГ НЭМЭГДҮҮЛЭН АЖИЛЛАЖ БАЙНА
Хан-Уул дүүргийн нутаг дэвсгэрт гэмт хэрэг, зөрчлөөс урьдчилан сэргийлэх, нийтийн хэв журам сахиулах эргүүл ажиллуулах чиглэлээр Цагдаагийн ерөнхий газрын дэд бөгөөд Нийслэлийн цагдаагийн удирдах газрын даргын баталсан төлөвлөгөөний дагуу Нийтийн хэв журам хамгаалах, олон нийтийн аюулгүй байдлыг хангах албаны Эргүүл хамгаалалтын газар, НЦУГ-ын Шөнийн эргүүлийн хэлтэстэй хамтран 25 чиглэлд 50 алба хаагч 11 дүгээр сарын 11-ний өдрөөс эхлэн явган эргүүлийн үүрэг гүйцэтгэж эхэллээ.
20:00 цагаас 03:00 цагийн хооронд үүрэг гүйцэтгэх дээрх алба хаагчдад Хан-Уул дүүргийн цагдаагийн газрын нэгдүгээр хэлтсийн дарга, цагдаагийн дэд хурандаа Д.Дашням үүрэг чиглэл өгч алба хаагч нарын албаны бичиг баримт, тусгай хэрэгсэлд үзлэг хийж ажилд нь гаргалаа.
